تاند، شنبه، د عقرب ۴مه: د ارګ یو شمېر سرچینې وایي، چې ولسمشر غني له ادربایجان څخه هېواد ته له راستنېدو سره سم ادریس زمان، د صلاح الدین رباني پر ځای د بهرنیو چارو سرپرست وزیر ټاکلی دی.
ادریس زمان تر دې وړاندې د حکمت خلیل کرزي پر ځای د بهرنیو چارو وزارت د سیاسي معین په حیث دنده ترسره کوله.
ارګ وایي، ادریس زمان به د حکومت تر پایه د یاد وزارت سرپرست وي، خو که بیا ولسمشر غني واک ته راځي، نو نوې کابینه به بیا جوړېږي.
دا په داسې حال کې ده چې څو ورځې وړاندې د ولسي جرګې لخوا سلب صلاحیت شوي، صلاح الدین رباني د دغه وزارت له درې کلنې سرپرستۍ وروسته استعفی ورکړې وه او لامل یې هم تعصب او نامطلوب کاري چاپیریال یاد کړی و.