ارګ، د امریکا ځانګړی استازی کابل کې ایسار کړی

تاند، چهار شنبه، د اسد ۲مه: حکومت د افغانستان په اړه د ټرمپ له سپکاوي ډکو څرګندونو وروسته د سولې په پروسه کې کابل ته راغلی زلمی خلیلزاد ایسار کړی دی.

ارګ وايي، ولسمشر غني بیګاه ماښام له نوموړي سره کتلي او لازمه یې ګڼلې ده چې زلمی خلیلزد څو ورځو لپاره کابل کې پاتې شي.

د ارګ د معلوماتو له مې بیګانۍ لیدنه کې ولسمشر غني له خلیلزاد سره د ټرمپ په وروستیو څرګندونو مشخص غږېدلی ، وضاحت یې ترې غوښتی او ورته یې ویلي دي چې څو ورځو پورې باید په کابل کې ایسار پاتې شي.

دغه راز زلمي خلیلزاد ولسمشر ته د سولې د پروسې په وروستیو پرمختګونو معلومات ورکړي دي.

دا په داسې حال کې ده چې د ټرمپ له څرګندونو وروسته ولسمشر غني خورا غوسه شوی او پرون یې ټوله ورځ یوازې درې کسانو، د امریکا سفیر سره له سهاره تر دوه بجو دوه ځلې، درې بجې له پخواني ولسمشر حامد کرزي او ماښام مهال یې له خلیلزاد سره کتلي چې د ټولو لیدنو د بحث موضوع د سرچینو په حواله یوازې د امریکا د ولسمشر په څرګندونو راڅرخېده.

د امریکا ولسمشر ویلي که مې غوښتلی افغانستان مې د نړۍ له نقشې ورکولای شو، خو نه غواړم هلته ۱۰ میلیونه انسانان ووژل شي.