تاند، یکشنبه، د حوت ۱۸مه: د ارګ سرچینو هغه اوازې په کلکه رد کړې چې ګواکې له عبدالله عبدالله سره د ۴۰ سلنه واک په شریکولو معامله شوې ده.
د ارګ د مذاکراتي ټیم یو غړي تاند ته د نوم نه شریکولو په شرط وویل، د عبدالله ډلې ورته په لومړۍ ناسته کې یو وار بیا د واک شریکولو وړاندیز کړی و چې دوی ته ولسمشر د دغې خبرې اجازه نه وه ورکړې او د ارګ پلاوی له هغې ناستې څخه په غوسه ووت.
خو دا سرچینه وایي، د حامد کرزي او استاد سیاف له لوري بیا وروسته د ملي یووالي حکومت د دوام نسخه وړاندې کړه چې ولسمشر غني دا هم رد کړه.
اوس د سرچینې په وینا د محمد اشرف غني او عبد الله عبدالله د ټاکنیزو ټیمونو تر منځ د نن ورځې مذاکراتو نتیجه کې عبدالله ومنله چې له اجراییه ریاست او تحلیف مراسمو به تېرېږي او غني به سبا دوشنبه د جمهور رییس په توګه خپله لوړه کوي.
د سرچینې په حواله د عبدالله ډلې نه به د ولسمشر په خوښه او صلاحیت ۳۰ سلنه کسان په دندو ګمارل کیږي چې د کارنده نه ثابتیدو له کبله به بیرته شړل کیږي.
همدا راز به عبدالله عبدالله چې تېر ۵ کاله يې د وزیرانو شورا مشري وکړه، د وزیرانو شورا رهبري هم له دې وروسته نه کوي او دا مشري به بیرته خپله اشرف غني کوي.
ددې تر څنګ چې عبدالله عبدالله ته د دېرش سلنه شاوخوا کې سهم ورکول کېږي، د سولې مذاکراتو کې به هم دخیل وي او یو شمېر برخې به پر مخ وړي.
که نظام پر دې حالت قناعت کولو ته پرېښودل سی هم غنیمت دی