تاند- د افغانستان د ولسمشر مرستیال ویاند هغه راپورونه رد کړل چې پر اساس یې ویل شوي و چې دولت د پخواني ولسمشر حامد کرزي او د هغه د دفتر لپاره ځانګړې بودجه په پام کې نیولې ده.
سید ظفر هاشمي وویل چې د پخواني ولسمشر دفتر ته کومه بودجه د افغانستان د دولت په بودجه کې نشته.
تر دې مخکې ځینو رسنیو ادعا کړې وه چې حکومت د پخواني ولسمشر لپاره ځانګړې بودجه تصویب کړې ده.
خو ظفر هاشمي دا تایید کړه چې تېر کال داسي یو وړاندیز شوی او ولسي جرګې ته هم وړاندی شوی و خو وروسته له دې چې جرګې دا وړاندیز رد کړ، ولسمشر غني په دې اړه کوم ځانګړی فرمان نه دی صادر کړی.
ده دا هم ومنله چې ټاکل شوې وه چې د کرزي دفتر ته بودجه ورکړای شي خو کله چې وړاندیز رد شوو دا بحث هم ورسره پای ته ورسېد.