اسلامي نړۍ د تپل سويو جګړو په لوخړو کي/ ابراهیم سپېڅلی

   د روان ٢٠١٤عيسوي کال د جولايي مياشتي پر اتمه نېټه اسرايلي الوتکو د عملياتو په پلمه د فسلطين پر غزه سيمه بمبارۍ پيل کړې

د راپورونو له مخي د يوې مياشتي په دوران کي اسراييلي طيارو پر غزه ۴۷۶۰ هوايي برېدونه کړي، چي ١٨٧٥ کسان وژلي دي.

د ملګرملتونو د معلوماتو پر بنسټ په ژول سويو کسانو کي ٨٥ سلنه ولسي وګړي او ان په ښوونځيو کي په لوست بوخت زده کوونکي دي.

فلسطين هم د افغانستان په ډول له تيرو څو پرله پسې لسيزو راهسي د جګړې په اور کي سوځي، فلسطين او افغانستان دواړه، د کونډو، يتيمانو او کنډوالو هيوادونه دي.

په دواړو هيوادونو کي هره ورځ ملکي خلک د غم پر ټغر ناست او خپله ډوډۍ له اوښکو سره خوري.

په جګړو کي که افغانستان دى يا فلسطين د سر تاوان ترڅنګ مالي ويجاړۍ هم په ميرات ورته پاتيږي، ليکن د بشري حقونو(!)چغي وهوونکي ټېکدران چيري دي؟ چي د ولسي خلکو ساندي واوري.

که تاسي رسنۍ تعقيب کړي وي، نو په دې وروستيو کي د فلسطين غزه يوه له هغو سيمو څخه ده، چي د اسراييلي بمباريو او جګړو له امله ډېره وځپل سوه، خو له بده مرغه څنګ ته يې ځيني پراته مسلمانان او شتنمن عرب د خپلو شخصي ګټو په خاطر په لوړ ږغ لاهم څه نه سي ويلاى.

په داسي حال کي، چي د اسلام پېغمبر(ص) فرمايي: ( مسلمانان لکه يو وجود داسي دي. ) ليکن افسوس! نن د مسلمانانو د وجود يوه برخه نه بلکي څو برخي په درد او غم اخته دي، خو د مسلمانانو بله برخه په چړچو کي غرق دي.

داښه خبره ده، چي نن يوځل بيا داسراييلو او فلسطينيانو ترمنځ په قاهره کي د سولي خبري پيل سوې.

په کار ده، چي د نړۍ مسلمانان د خپلو سياسي، اقتصادي او نورو فشارونو په سبب داخبري لومړى دوامداره او بيايي په يوې داسي ډول پاى ته ورسوي، چي د غزې ترڅنګ د فلسطين هره برخه د اسراييلو له راتلونکو خپلسريو څخه د تل لپاره وژغورل سي.

فلسطينيان که څه هم په تش لاس د اسراييلو مقابله کوي او دا مقابله يې تيري څو لسيزي په مېړانه بريالۍ ساتلې، خو په کار ده، چي له دې وروسته دغه روانه جګړه په تلپاته سوله بدله سي، ځکه اوسمهال ټول هغه اسلامي هيوادونه، چي تپل سويو جګړو ځپلي يوې دوامداري سولي ته اړتيا لري، ترڅو دوى يوځل په ارام دماغ پر خپلو چارو له سره غور وکړي.

په اسلامي نړۍ کي تر هرڅه لومړى تلپاته سوله مهمه ده او وروسته د نورو شتمنو اسلامي او که امکان ولري دغيري اسلامي هيوادونو بلاعوضه اقتصادي مرستوته ډېره اړتيا لري.

د خداى لپاره ! دا څه حال دى؟ ورځ تربلي اسلامي هيوادونه په يو او بل نوم د مشرانو له نعمت څخه د بې برخي کېدو ترڅنګ دوستۍ(!)په نامه يوڅو مياشتي بې شماره مرستي وي، خو وروسته دا مرستي په ورور وژنه، ورانۍ او اوږدې جګړې بدلي سي.

موږ او تاسي وينو، چي عراق، لبيا، افغانستان، فلسطين، سوريه، شام اوځيني نور اسلامي هيوادونه همدااوس په دې دوږخ کي سوځي، خو د سولي او بشريت (!)نړيوال ټېکداران خپلو اتباعو او سفيرانو ته په خوندي ځايونو کي د پټېدو يا له ځينو يادو هيوادونو څخه د وتلو سپارښتني کوي.

په دغسي حساسو شرايطو کي يوازي د مسلمانانو ريښتني يووالى، په دين پوهېدنه او عمل هغه څه دي، چي له دغه روان ناورين څخه ژغورل کېداى سي.

يوازي پر ډلو ډلو د وېشل کيدل، ياد د مادي امتيازاتو لپاره تر نابلدو وزرونو سرلاندي کول، له پوهي تېښته او نوري ورته چاري هغه څه دي، چي زموږ کښتۍ د ساحل پرځاى طوفاني ته څپو ته مخامخ کوي.

٠٧ – ٠٨ – ٢٠١٤ پنجشنبه، کندهارښار، چوڼۍ