تاند، پنجشنبه، د عقرب ۳۰ مه: د افغانستان د بهرنیو چارو وزارت اعلان کړه چې د یونسکو د علمي، فرهنګي او روزنیز نړیوال سازمان د اجرائیوي بورډ غړیتوب یې ترلاسه کړی دی.
د بهرنیو چارو وزارت په یوه خبرپاڼه کې ویلي، افغانستان به تر څلورو کلونو پورې یوه دوره د دغه سازمان د اجرائیه بورډ غړی وي.
د بهرنیو چارو وزارت ویاند ګران هېواد بیا تاند ته وویل، افغانستان د دغه بورډ غړیتوب د یوې رقابتي پروسې په بشپړولو ترلاسه کړی دی چې دا کار د افغانستان لپاره لویه لاسته راوړنه ده چې ورسره به په ملګرو ملتونو کې د افغانستان د پرېکړو واک زیات شي.
اجرایه بورډ په یونسکو نړیوال سازمان کې د دارالانشاء، عمومي مجلس او درې ګوني اساسي کمېټې سره په خوا کې باصلاحیته څانګه ده.
افغانستان تر دې وړاندې په سارک سازمان کې هم درې مهمې څوکۍ خپلې کړې وې.