تاند، چهار شنبه، د عقرب ۲۹مه: ناټو مشران به راتلونکې میاشت په لندن کې د دغه سازمان په سرمشریزه کې د نورو موضوعاتو تر څنګ د افغانستان په ماموریت هم ځانګړي بحثونه وکړي.
د ناټو سرمنشي یانس سټولټنبرګ تېره ورځ د ناټو خارجه وزیرانو له غونډې وړاندې رسنیو ته وویل، د لندن په ناسته کې به له ترهګرۍ سره د مبارزې په برخه کې د ناټو په پراخ رول بحثونه وشي.
ښاغلي سټولټنبرګ زیاته کړه، په افغانستان او عراق کې دا مهال ناټو روزنیز ماموریتونه ترسره کوي تر څو د داعش ډلې د بیا راپورته کېدو مخنیوی وشي: (( په افغانستان کې د ترهګرۍ پر ضد نظامي عملیات او مبارزه ډېره ښه روانه ده، باوري یم چې دا هېواد بیا د ترهګرو په ځاله نه بدلېږي.))
نوموړي زیاته کړه، ناټو په افغانستان کې د داعش ډلې لپاره د سر بیا راپورته کولو د مخنیوي په برخه کې د ډاډ وړ همکارۍ ته دوام ورکوي.
دا په داسې حال کې ده چې تېره ورځ ولسشمر غني ننګرهار ته د یو سفر په ترڅ کې د داعش ډلې بشپړه ماتې اعلان کړه او زیاته یې کړه سلګونه تسلیم شویو داعش کورنیو ته به مناسب کاري فرصتونه برابر کړي.