تاند- د افغانستان او کرویشیا ولسمشرانو د شنبې په ورځ په وارسا کې د دوو هیوادونو ترمنځ د هراړخیزو همکاریو موافقه لاسلیک کړه.
د ټوټال کرویشیا نیوز انلاین خپرونې د راپور له مخې، د کرویشیا ولسمشرې کولیندا ګرابر کیتاروفیچ له ولسمشر غني سره د موافقې له لاسلیکولو وروسته وویل«دا د مهاجرت د عواملو د مجموعي حل لور ته یوازې یو ګام دی. په لکونو خلک شته چې د امنیتي او اقتصادي ستونزو، نابرابرۍ، مذهبي نه زغم او تروریزم له لاسه له افغانستانه وځي.»
د دې موافقې پر اساس به د دواړو هیوادونو د بهرنیو چارو وزیرانو په مشرۍ ګډې کمېټې جوړې شي. دوی دغه راز د پرمختیايي مرستو په چوکاټ کې د همکارۍ پر یوه ځانګړي پلان سلا وکړه چې پر اساس به یې کرویشیا د تعلیم، په تېره بیا د نجونو او ښځو د زده کړو او اقتصادي پیاوړتیا په برخو کې له افغانستان سره مرسته کوي. د اقتصادي پیاوړتیا په برخه کې به ځانګړی پام د کوڅو بېوزلو ماشومانو ته وي.
کرویشیا به د روغتیا، بیخ بنا په برخو کې هم له افغانستان سره مرستې کوي او دغه راز به د دفاعي او امنیتي مسلو په برخو کې همکاري کوي.
د کرویشیا ولسمشرې افغانستان ته د خپل سفر یادونه وکړه، ویې ویل چې یو نیم کال پخوا یې په افغانستان کې حالات له نژدې ولیدل.