تاند، یکشنبه، د حمل ۳۱ مه: د عامې روغتیا وزارت وایي، تازه پر کورونا وېروس ۶۳ افغانان اخته شوي، چې ډېر یې په کابل ولایت کې دي.
د دغه وزارت ویاند وحیدالله مایار د یکشنبې په ورځ یوې خبري غونډې ته وویل، په تېرو ۲۴ ساعتونو کې د کورونا وېروس ۶۳ مثبتې پېښې ثبت شوې، چې له ډلې یې ۳۱ په کابل، ۱۶ په بلخ، ۶ په کنړ، ۴ په هرات، ۳ په بغلان او په لغمان، جوزجان او فاریاب ولایتونو کې یو یو تن تازه پر دې وېروس اخته شوي دي.
د هغه په خبره، په هېواد کې د نوو پېښو په ثبتېدو سره پر کورونا د اخته کسانو شمېر ۹۹۶ تنو ته ورسېد.
د مایار په وینا، په هېواد کې تازه له کورونا وېروس ۱۵ تنه ښه شوي، چې په دې سره له کویډـ ۱۹ ناروغۍ د روغو کسانو شمېر ۱۳۱ تنو ته ورسېد، چې ډېری روغ شوي کسان په هرات ولایت کې دي.
هغه وایي، تر اوسه کورونا وېروس د ۳۳ افغانانو ژوند اخیستی دی.
روغتیایي چارواکي له هېوادوالو په ټینګه غوښتنه کوي، چې کورونا وېروس جدي وبولي او لازمو تدابیرو ته پام وکړي