تاند- د افغانستان او پاکستان سوداګرو پرېکړه کړې چې د سوداګرۍ او پانګونې ګډه طرحه جوړه کړي.
د خیبرپښتونخوا د سوداګرۍ او صنایعو د خونې ريیس ذبیح الله شینواري وویل، د افغانستان او پاکستان د سوداګرۍ د ګډو خونو او د افغانستان د پانګونې د ملاتړ ادارې (ایسا) په کابل کې د تفاهم یو یادښت لاسلیک کړ.
ده دا خبره له کابله تر ستنېدو وروسته نن په پېښور کې وکړه.
د پاکستان د سوداګرۍ او صنعتونو د خونو شل کسیز پلاوی تېره اوونۍ کابل ته راغلی و.
ښاغلي شینواري د دواړو خواوو د ګډې طرحې په اړه وویل چې د پانګونې دا پروګرام به دواړو هیوادونوته، چې د سوداګرۍ او پانګونې پراختیا ته اړتیا لري، ګټه ورسوي.
پاکستاني پلاوي د افغانستان د سفر په لړ کې د ولسمشر له دوهم مرستیال کریم خلیلي او د افغانستان د سوداګرۍ او صنعتونو د خونو له رييس خانجان الکوزي سره ولیدل.
د دواړو خواوو له موافقې سره سم به افغانستان پاکستاني سوداګرو او پانګوالو ته په افغانستان کې د پانګونې اسانتیاوې برابروي او په اسانه به جواز ورکوي.
دواړو خواوو د مالونو په ترانزیت کې هم د ستونزو د لېرې کولو غوښتنه وکړه.
د افغانستان د سوداګرۍ او صنعتونو د خونو مشر خانجان الکوزي وویل چې تر ډېره به په پاکستان کې د افغان سوداګرو ستونزې حل شي.
ښاغلي الکوزي تېره اوونۍ /چهارشنبه/ وویل، که څه هم پخوا افغان سوداګرو په پاکستان کې د ترانزیت په برخه کې ډېرې ستونزې لرلې خو اوس یې په سولو کې اتیا ستونزې کمې شوي دي.
ده همداراز وویل، هڅه کوي چې د افغانستان او پاکستان ترمنځ سوداګریزه راکړه ورکړه پیاوړې او د ترانزیت په برخه کې نورې ستونزې هم هوارې کړي.
ښاغلي الکوزي د پاکستان افغانستان د سوداګرۍ د ګډې خونې په دویمه کلنۍ غونډه کې هیله څرګنده کړه چې؛ له دې وروسته به له پاکستان سره سوداګري د سیاست تر سیوري لاندې را نه شي:
اوس د افغانستان او پاکستان ترمنځ سوداګري راکړه- ورکړه د کال څه باندې دوه میلیارده ډالرو ته رسیږي، خو پاکستاني سوداګر وایي، دا اندازه باید د کال اوو میلیاردو ډالرو ته پورته شي.