تاند- افغان امنیتي ځواکونو په کندهار کې د وسله والو طالبانو د موټرو پر یوه لوی کاروان په برید کې لږترلږه ۳۰ وسله وال طالبان وژلي دي.
راپورونه وايي چې د وسله والو طالبانو د لنډ کروزرو کاروان په میوند ولسوالي کې پر امنیتي پوستو د حملو لپاره روان و، چې ځانګړو افغان هوايي ځواکونو پرې برید وکړ.
د کندهار د امنیې قوماندانۍ ویندوی ضیا دراني وویل چې په دې برید کې، چې تېره شپه د میوند ولسوالي په بند تیمور سیمه کې وشو، د یوه طالب قوماندان په شمول ۳۰ طالبان وژل شوي دي.
دراني وویل چې له خاص افغان ځواکونو سره په دې برید کې د ناټو غوڅ ملاتړ ماموریت هوايي ځواک تخنیکي ملاتړ کړی دی.
د دراني په وینا په لنډ کروز موټرو کې د طالبانو وسلې او چاودېدونکي مواد چاودلي او موټرونه یې یومخ ویجاړ کړي دي.
وسله والو طالبانو تراوسه پوري د کندهار د ولایتي چارواکو د دې ادعا په اړه څه نه دي ویلي.