تاند- د امریکا د پوځ یو پخواني چارواکی وايي، په افغانستان کې د طالبانو پر ضد د جګړې د ګټلو لپاره پکار ده چې د پاکستان په خاوره کې د دې ډلې پناهځایونه له منځه یووړل شي.
متقاعد جنرال جان ایم کین، چې پخوا د پوځ مرستیال رييس او د جنګي مطالعاتو د انستیتیوت رييس و، وویل، د پاکستان پوځ افغان طالبانو ته د استخباراتي معلوماتو، روزنې او لوژیستیک په برخو کې مرسته ورکوي.
ده د سې شنبې په ورځ د امریکا د مشرانو جرګې د وسله والو خدماتو کمېټې ته د نړیوالو ګواښونو په اړه د معلوماتو وړاندې کولو په مهال وویل«لازمه ده چې یوه داسي نوې ستراتیژي خپله شي چې په پاکستان کې پناهځایونه له منځه یووړل شي. د طالبانو پناهځایونه په پاکستان کې دي او د پاکستان پوځ هغوی ته استخباراتي معلومات، روزنه او لوژیستیکي مرستې برابروي.»
متقاعد جنرال کین همداراز وویل، هیڅ یاغي او چریکي ډله تر هغو ماته شوې نه ده چې د جګړې له سیمې دباندې یا له هیواده دباندې یې پناهځایونه له منځه وړل شوي نه وي.
ده د افغانستان په وړاندې د اوباما پر پالیسي هم نیوکه وکړه، ویې ویل چې د اوباما پالیسي دا نه وه چې جګړه وګټي بلکې د ده پالیسي دا وه په افغانستان کې د امریکا ښکېلتیا پای ته ورسوي.
ده همداراز وویل«د امریکا نوی حکومت باید سیاسي او امنیتي ارزونه وکړي او د افغانستان د پنځلس کلن جنګ د نه ګټل کېدو عوامل وڅېړي.
«پکار ده چې په نوې ستراتیژي کې په پاکستان کې د پناهځایونو د له منځه وړلو او د وضعیت د بدلولو لپاره افغان ملي امنیتي ځواکونو ته د دوی د اړتیا وړ امکاناتو د برابرولو ژمنه شوې وي لکه استخباراتي مرسته، جنګي هیلي کوپترونه، جنګي الوتکې، د ماین ضد وسایط…
«د عیني شرایطو له څېړنې پرته، که رښتیا ووایم نه شم ویلی چې څومره اضافي ځواکونو ته به تر کله اړتیا وي.»