تاند، سه شنبه، د حمل ۲۶مه: د امریکا د بهرنیو اړیکو شورا په نوم د څېړنیز مرکز غړی بروس هافمن خبرداری ورکړی چې د طالبانو او امریکا هوکړه به په سویلي اسیا کې تیاره خوره کړي.
نوموړي د امریکا غږ انګلیسي څانګې سره په مرکه کې ویلي، دغه تړون سویلي اسیا د تاریکۍ پر رول روانه کړې ده او ورسره به القاعده ډله بېرته په سیمه او افغانستان کې وده وکړي.
ښاغلی هافمن د سولې په پروسه کې د طالبانو په ژمنو شکمن دی او وايي، طالبان د امریکا له دې غوښتنې د ځان په ګټه استفاده کوي چې وايي، افغانستان کې جګړه ختمول غواړي او خپل سرتېري باسي.
نوموړي په افغانستان کې د داعش د خراسان مشر اسلم فاروقي نیونه مهمه بللې خو وايي، متاسفانه داعش، القاعده او طالبان په جګړه کې د خپلو مشرانو بایللو ته چمتو دي او ځایناستې برنامې هم ورته لري.
ښاغلی بروسمن دا خبرې په داسې حال کې کوي چې د امریکا او طالبانو د تړون یوه نیمه میاشت پوره کېدونکې ده چې له مخې یې طالبانو پر امریکایانو یو برید هم نه دی کړی خو پر افغان ځواکونو یې تر دې دمه له ۲ زرو څخه زیات بریدونه کړي دي.
تازه د دغې ډلې منشور هم تاند ته رسېدلی دی چې غواړي ژر تر ژره په افغانستان کې خپل اسلامي امارت حاکم کړي.