امریکايي چارواکو هڅه وکړه چې د افغانستان د سولې په اړه هندیانو ته قناعت ورکړي

تاند- د امریکا متحدو ایالتونو او هند د افغانستان په اړه په لوړه کچه خبرې اترې پیل کړې دي.

د هندي رسنیو د راپور له مخې هند او امریکا دواړه یوه سوله ییز، ثبات لرونکي او سوکال افغانستان ته ژمن دي او د دې ژمنې په خاطر د افغانستان او پاکستان لپاره د امریکا د خاص استازي مرستیال لوریل میلر د هند له چارواکو، د مدني ټولنې له غړیو او د سیاسي ګوندونو له مشرانو سره د افغانستان په باب په لوړه کچه سلا مشورې وکړې.

میلر د یوه پلاوي په مشرۍ د روانې فبرورۍ له شپاړسمې تر اتلسمې نېټې پوري د افغانستان په اړه په هند کې سلا مشورې وکړې.

باوري سرچینې وايي چې امریکايي پلاوي د هند د سفر په لړ کې هڅه وکړه چې هند د افغانستان د حکومت او طالبانو ترمنځ د سولې او پخلاینې منلو ته وهڅوي. هند فکر کوي چې له افغان حکومت سره د طالبانو له روغې جوړې به پاکستان ګټه واخلي.

باور کېږي چې طالبان به تر حمل مخکې د افغانستان له حکومت سره د سولې خبرې یا په کابل او یا په اسلام اباد کې پیل کړي. د پیکینګ او دوبۍ احتمال هم ورکړای شوی دی.

ځینو هندي شناندو ویلي دي چې که د طالبانو د پخلاینې موضوع جدي وي باید هند د اشرف غني او عبدالله عبدالله ترمنځ هغه څوک غوره کړي چې د پاکستان په ګټه د سولې له بهیر سره مخالفت کوي.

په نوي ډیلي کې د امریکا د سفارت په یوه خبرپاڼه کې، چې د پنجشنبې په ورځ خپره شوه، ویل شوي:«سلامشورو د سوله ییز او سوکال افغانستان لپاره د سیمه ییزو همکاریو په برخه کې زموږ د ګډې ژمنې له عملي کېدو سره مرسته وکړه.»

په دې خبرپاڼه کې دا نه دي ویل شوي چې ایا هند حاضر دی چې د افغانستان د حکومت او طالبانو د سولې ملاتړ وکړي.
تر دې مخکې هند ته د ولسمشر بارک اوباما د سفر په پای کې د هند او امریکا په ګډه اعلامیه کې ویل شوي و چې دواړه هیوادونه سوله ییز، ثبات لرونکی او سوکال افغانستان غواړي.