تاند- د امریکا متحدو ایالتونو د افغانستان او پاکستان ترمنځ د منځنۍ اسیا د هیوادونو د برېښنا د ترانزیت پر بیې د موافقې هرکلی وکړ.
د امریکا د بهرنیو چارو وزارت د شنبې په ورځ ناوخته وویل چې دا موافقه د افغانستان او پاکستان ترمنځ په دوه اړخیزو اړیکو کې یو مهم ګام ګڼل کېدای شي.
د متحدو ایالتونو د باندنیو چارو وزارت ویندویې جین پساکي په یوه خبرپاڼه کې ویلي چې دا په کابل کې د ولسمشر اشرف غني احمدزي په مشرۍ د ملي یووالي د حکومت د بهرنۍ پالیسۍ یوه لومړنۍ بریا ده.
پساکي همداراز ویلي، د منځنۍ اسیا او جنوبي اسیا د برېښنا د ترانزیت د پروژې بشپړېدا به قرغیزستان جمهوریت او تاجکستان ته دا موقع ورکړي چې د دوبي په موسم کې خپله اضافي برېښنا پر افغانستان او پاکستان وپلوري.
دې وویل چې دا پروژه د سیمې د انرژۍ د بازار لپاره، چې د انرژۍ مهیا کوونکي د هغې له مصرفوونکو سره وصلوي، د ودې ضروري عنصر دی.
د امریکا د باندنیو چارو وزارت ویندویې همداراز وویل چې د برېښنا د ترانزیت د بیې پرسر موافقه د برېښنا د بیې په اړه د وروستي جوړجاړي لور ته یو مهم ګام دی.
هر کالای یی وکړ………..
تاند ډیری غلطیانی کوی ، هغه نوری خو یی لا خیر عنوان ته خو باید لږه توجه وشی!