تاند- د امریکا دفاع وزارت د دغه هیواد له (اورینټل اي ټي کې) کمپنۍ څخه د افغانستان د هوايي ځواک لپاره ۷ (AC-208) ترانسپورتي الوتکې اخلي.
د افغانستان هوايي ځواک، چې حاضردمه یوازې څو ترانسپورتي الوتکې لري، د ترانسپورتي الوتکو د کموالي له کبله د لوژیستیکي عملیاتو په برخه کې زیاتې ستونزې لري.
د امریکا له لوري پېرل کېدونکې ۷ نوي الوتکې زیاتې پرمختللې او مدرنې دي.
ویل شوي چې په دغو الوتکو کې وسله هم نصب کېدای شي.
د افغانستان ولسمشر محمد اشرف غني پخوا ویلي و چې د هیواد هوايي ځواک به تر ۲۰۲۰ م کال پورې په بشپړ ډول مجهز شي.
ټاکل شوې ده چې امریکا افغان هوايي ځواک ته ۱۵۹ بلک هاوک هیلي کوپترونه او یو شمېر نورې جنګي الوتکې ورکړي.
امریکا د افغان امنیتي ځواکونو لپاره د کال ۴ ملیارد ډالره بودجه په پام کې نیولې ده.
حاضردمه د افغانستان هوايي ځواک ۱۲۰ الوتکې لري.