امریکا مېشتې افغانان د پاکستان پر ضد مظاهره کوي

تاند- د امریکا په متحدو ایالتونو کې مېشت افغانان به د یکشنبې په ورځ «د افغانانو وینه» په نوم له ترهګرۍ سره د پاکستان د ملاتړ پر ضد مظاهره وکړي.

امریکا مېشتې افغانان، چې د افغان امریکایانو ټولنه بلل کېږي، وايي چې دا مظاهره د دې لپاره کوي چې د افغانستان او پاکستان حکومتونه همکارۍ او د ترهګرۍ او سختدریځۍ پر ضد مبارزې ته وروبولي.

د مظاهرې یوې ترتیبوونکې عایشې وهاب وویل:«د طالبانو مشر دوه کاله پخوا په پاکستان کې مړ شو، اسامه بن لادن په ۲۰۱۱ کال په پاکستان کې ووژل شو خو لا هم په دغه هیواد کې د تروریستانو د روزلو کمپونه فعال دي او بې شمېره بمونو او بمي حمله کوونکو ته اجازه ورکوي چې افغانستان ته ولېږل شي.»

اغلې وهاب همداراز وویل:«دا مظاهره د افغانانو، امریکایانو او هر هغه چا لپاره ده چې له تاوتریخوالي ستومانه شوي او د سختدریځۍ، ترهګرۍ او د بې ګناه انسانانو د وژلو پای ته رسېدا غواړي.»

د امریکا د کلیفورنیا په شمال کې په زرګونو افغانان اوسي. دوی خلکو ته بلنه ورکړې چې د یکشنبې په ورځ په (Fremont Amtrak Station, 37260 Fremont Blvd) ادرس په مظاهره کې ګډون وکړي.

د مظاهرې ترتیبوونکي وايي، سره له دې چې ډېری افغانان په کار بوخت دي او حتی د رخصتیو په ورځو هم کار کوي خو باور لري چې یوه ورځ او هغه هم د مازدیګر څلور بجې د خپل هیواد او وطنوالو لپاره د پیسو له ګټلو تېرېږي.

د دوی په وینا دا ډول اقدامات، که څه هم سمبولیک دي خو د افغانستان او سیمې لپاره د امریکا پر پالیسیو بې اغېزې نه دي.

د امریکا حکومت په وروستیو کې د پاکستان له لوري د تروریستانو پر ضد مبارزه کافي نه ده بللې او ویلي یې دي، د هغو پیسو بله برخه به پاکستان ته ورنه کړي چې د حقاني شبکې پر ضد د اقدام په خاطر یې پاکستان ته ورکوي.

فرانس پریس خبري اژانس د خبرو سرچینو په قول د پنجشنبې په ورڅ وویل چې د متحدو ایالتونو د بهرنیو چارو وزارت دا پیغام په واشنګټن کې د پاکستان سفارت او دغه راز په اسلام اباد کې پاکستاني چارواکو ته لېږلی دی.