تاند- د افغانستان ملي اردو په مزارشریف ښار کې د هند د کونسلګرۍ مخته په یوه کور کې څلور تنه ترهګر له ۲۴ ساعتونو وروسته له منځه یووړل.
افغان امنیتي چارواکي وايي چې له احتیاط څخه یې کار اخیست څو د تروریستانو د ځپلو له کبله په شاوخوا کورونو کې عامو خلکو ته تاوان وانوړي.
د بلخ ولایت د مطبوعاتي دفتر په وینا د وسله والو ترهګرو پر ضد عملیات د افغانستان د ملي پولیسو او ملي اردو د خاصو ځواکونو له لوري په ګډه ترسره شول او د بلخ سرپرست والي عطا محمد نور یې څارنه کوله.
عطا محمد نور مخکې ویلي و چې د هند د کونسلګرۍ په شاوخوا کې تصفیوي عملیات پای ته رسېدو ته نژدې شوي، امنیتي ځواکونه په احتیاط ګام اخلي څو خلکو او د هغوی شتمنیو ته تاوان ونه رسېږي.
د راپورونو له مخې په مزارشریف کې د خاصو افغان ځواکونو په عملیاتو کې د ۵ امنیتي ځواکونو په شمول ۹ تنه ژوبل شوي دي.
امنیتي چارواکي وايي چې په دې عملیاتو کې یو پوځي او ۴ ترهګر وژل شوي دي.