اکسفام: د ۲۶ تنو شتمني د نړۍ د نیمايي بېوزلو له شتمنۍ سره برابره ده

تاند- اکسفام وايي، د نړۍ د ۲۶ شتمنو کسانو شتمني د دې کُرې د نیمايي وګړو له ټولې شتمنۍ سره برابره ده.

اکسفام مرستندویې موسسې، په نړۍ کې د بېوزلو او بډایو ترمنځ د شتمنو په وېش کې د توپیر د زیاتېدو په اړه نن /دوشنبه/ په یوه راپور کې ویلي چې ۲۶ ملیاردران دومره شتمني لري چې د نړۍ د ۳ ملیارده او ۸۰۰ ملیون تنو بېوزلو له شتمنۍ سره برابرېږي.

اکسفام د سویس په دافوس کې د نړیوالې اقتصادي غونډې (فورم) په درشل کې ویلي چې ۲۰۱۸ داسې کال و چې شتمن پکې لا شتمن شول او بېوزله لار بېوزلي شول.

د دې مرستندویې ادارې په وینا، دا توپیر د بېوزلۍ پر ضد مبارزه له ستونزو سره مخامخوي.

اکسفام وايي، که له شتمنو څخه یو فیصد زیاته مالیه واخیستل شي نو د کال به ورڅخه ۴۱۸ ملیارد ډالره جوړ شي چې دا پیسې د نړۍ د ټولو ماشومانو د زده کړو او روغتیايي خدماتو لپاره کافي دي.

د اکسفام په وینا که شتمن یو فیصد زیاته مالیه ورکړي، په نړۍ کې به یو زده کوونکی هم بې ښوونځي پاتې نه شي او د کال د ۳ ملیونه انسانانو د مړینو مخه به ونیول شي.

د ګارډین ورځپاڼې د راپور له مخې، اکسفام وايي، په ۲۰۱۸ م کال په نړۍ کې د ۲۲۰۰ ملیاردرانو شتمني ۹۰۰ ملیارد ډالرو ته زیاته شوې، په بله ژبه د دوی شتمني د ورځې ۲ ملیارد ډالره ډېره شوې ده.

د اکسفام مرستندویې ټولنې د راپور پر اساس، په ۲۰۱۸ کې د ۲۰۱۷ په پرتله د نړۍ د خورا بډایو شتمني په سلو کې ۱۲ ډېره شوې خو په مقابل کې یې د نړۍ د بېوزلو شتمني، چې د دې کُرې نیمايي نفوس تشکیلوي، په سلو کې ۱۱ کمه شوې ده.

د اکسفام په راپور کې همداراز راغلي:

په تېرو ۱۰ کلونو کې، د اقتصادي بحران له پیلېدو راوروسته د نړۍ د ملیاردرانو شمېر نژدې ۲ برابره شوی دی.

د ۲۰۱۷ او ۲۰۱۸ ترمنځ په هرو دوو ورځو کې یو نوی کس ملیاردر شوی دی.

د نړۍ تر ټولو ستر ملیاردر، جیف بیزوس، چې د امازون خاوند دی، خپله شتمني ۱۱۲ ملیارد ډالرو ته رسولې ده. د ده د شتمنۍ یوازې په سلو کې یو د یوتوپیا له هغې بودجې سره برابره ده چې دا هیواد یې د خپلو ۱۰۵ ملیون وګړو د روغتیا لپاره لري.

اکسفام دا هم ویلي چې په نړۍ کې د ورځې ۱۰ زره انسانان یوازې د روغتیايي خدماتو د نشتوالي له کبله مري.