تاند، چهارشنبه، د حوت ۲۸مه: په ایران کې د افغانستان سفارت د یوې سرچینې په قول، ایران له دغه هیواده دوه افغان دیپلوماتان اخراج کړي دي.
سرچینې چې نه یې غوښتل د دې موضوع د حساسیت له امله یې نوم واخیستل شي، ویلۍ ، د ایران حکومت درې ورځې وړاندې په ایران کې دوه افغان دیپلوماتان اخراج کړل او د ایران حکومت دا کار ۴۵ ورځې وړاندې د افغان حکومت لخوا د دوه ایراني دیپلوماتانو د شړلو په غبرګون دا کار کړی دی.
د سرچینې په وینا ، د ایران لخوا اخراج شوی یو افغان دپلومات په تهران کې د افغانستان په سفارت او دوهم یې په مشهد کې د افغانستان په قونسلګرۍ کې کار کاوه.
سرچینه وایي یو ډیپلومات له هغه وخته ایستل شوی، کله چې هغه د کورونا له امله په قرنطین کې و خو اصلي خبره دا ده چې له دواړو هیوادونو څخه د څلورو ډیپلوماتانو د ایستلو لامل د جاسوسۍ تورونه وو.
په تهران کې د افغانستان سفیر غفور لېوال په دې اړه له څه ویلو ډډه کوي خو د افغانستان د باندنیو چارو وزارت ویاند ګران هیواد بیا ویلي، د افغانستان – ایران اړیکې معمول سره سمې او د ښه ګاونډیتوب په اساس روانې دی.
نومودی وایي، د دواړو هیوادونو قونسلي او سیاسي اړیکې نورمال دي او دوی پرته له کومې ستونزې کار کوي.
ایران د افغانستان ترټولو لوی سوداګریز شریک دی او په ملیونونو افغان اتباع د تیرو څو لسیزو جګړو په لړ کې ایران ته اوښتي دي، خو دا هیواد له کلونو راهیسې افغانستان کې په جاسوسۍ او نیابتي جګړو کې هم ښکیل بلل کیږي.