تاند- ایران وايي، له افغانستان سره د بندیانو د تبادلې د موافقې پر اساس ۲۳۰ تنه په جرمونو محکوم شوي افغان بندیان افغانستان ته سپاري.
د ایرنا د راپور له مخې، د ایران د عدلیې مرستیال وزیر محمود عباسې د یکشنبې په ورځ وویل، دا بندیان د هغې موافقې له مخې افغانستان ته سپارل کېږي چې ۲ میاشتې پخوا په تهران کې د بندیانو د استرداد په اړه د دوو هیوادونو ترمنځ لاسلیک شوه.
عباسي همداراز وویل چې د روان لمریز کال تر پایه به ایران افغانستان ته ۷۰۰ بندیان وسپاري.
د ده په وینا اکثره افغان بندیان د نشه يي موادو او یا ایران ته د غیرقانوني اوښتو په جرمونو نیول شوي دي.
د ایران د عدلیې مرستیال وزیر وايي چې افغان بندیان به د خپل قید پاتې موده د افغانستان په محبسونو کې تېره کړي.
ده په یو وار د دومره شمېر بندیانو سپارل بې ساری وباله.
د دغه ایراني چارواکي په وینا دا بندیان د ایران د فعالې دیپلوماسۍ په نتیجه کې افغانستان ته استول کېږي.
تر دې وړاندې افغانستان یو شمېر ایراني مجرمان له نیولو وروسته ایران ته سپارلي دي.