ایستونیا په ۱۰۰ یورو تابعیت ورکوي

تاند- ایستونیا، چې نفوس یې مخ په کمېدو دی، یوازې د سل یورو په وړاندې د نورو هیوادونو اتباعو ته تابعیت ورکوي.

د بریتانیا د ګارډین ورځپاڼې د راپور له مخې، ایستونیا نه یوازې د لږ پیسو په وړاندې نورو وګړو ته تابعیت ورکوي بلکې د تابعیت د ورکړې شرایط یې خورا اسانه کړي دي، یعني تقاضا کوونکی یوازې د یوې انلاین فورمې ډکولو ته اړتیا لري.

د ایستونیا ډېری وګړي نه غواړي چې ودونه وکړي او هغوی چې واده کوي، لېواله نه دي چې ماشومان ولري، همداراز ډېر شمېر نور ایستونیایان د اروپا د پولو د ازادېدو په خاطر غوره ګڼي چې په پرمختللیو لوېدیځو هیوادونو کې واوسي.

د ایستونیا حکومت هیله لري چې د نورو هیوادونو اتباعو ته د تابعیت په ورکولو به د هغوی پانګونه په خپل هیواد کې جلب کړي.

د ۲۰۱۳ کال د سرمشېرنې له مخې د ایستونیا نفوس یو ملیون او ۳ لکه ۲۵ زره دی. د بالتیک د سیمې دا هیواد له روسیې او لاتویا سره پوله لري او بالتیک سمندرګی یې له فنلنډه جلا کوي.

ویل شوي چې ځیني بریتانیایان، چې له اروپايي اتحادیې څخه د بریتانیا د وتلو له کبله یې سوداګري او پانګونه له ستونزو سره مخامخ کېږي، غواړي چې د خپل بریتانیايي تابعیت ترڅنګ د ایستونیا تابعیت واخلي څو د اروپايي اتحادیې امتیازونه له لاسه ورنه کړي.

د ګارډین ورځپاڼې د راپور له مخې، تراوسه ۱۲ زره تنو د ایستونیا د تابعیت د ترلاسه کولو لپاره نومونه ثبت کړی دی.