تاند- په کابل کې پر G4S بریتانیايي امنیتي کمپنۍ د تېرې شپې په حمله کې د دې کمپنۍ ۵ غړي وژل شوي او په لسګونه نور ژوبل شوي دي.
د دې کمپنۍ اجرايي ريیس چارلي بربرید نن /پنجشنبه/ وویل«په خورا خواشینۍ تاییدوم چې زموږ ۵ کارکوونکي وژل شوي او ۳۵ نور ژوبل شوي دي چې د هغو په منځ کې د ۵ تنو حال نازک دی…»
ده زیاته کړه، په وژل شویو کې ۴ افغانان او یو بریتانیايي دی.
وسله والو طالبانو د دې برید مسوولیت په غاړه اخیستی دی.
د کورنیو چارو وزارت د دې برید د تلفاتو شمېر ۱۰ تنه ښودلی او ویلي یې دي چې د ۱۵ بهرنیانو په ګډون ۲۷ نور ژوبل شوي دي.
دا وزارت هم تاییدوي چې په دې حمله کې یو بهرنی وژل شوی دی.
داسې ښکاري چې ۵ تنه نور وژل شوي کسان امنیتي ځواکونه دي چې بریتانیايي کمپنۍ یې یادونه نه ده کړې.
دا برید تېره شپه په یوه موټربمي برید پیل شو او د سهار تر ۳ بجو پورې یې دوام وکړ.
د کورنیو چارو وزارت وايي چې برید د دې لپاره دوام وکړ چې ۳۳۰ تنه په ودانۍ کې بند پاتې ول.
د وسلهوالو طالبانو یوه ویاند ذبیحالله مجاهد رسنیو ته په استولې خبرپاڼه کې ویلي په حمله کې د دوی ۵ وسله والو برخه لرله او په لړ کې یې لسګونه کسان وژل شوي او سلګونه نور ټپيان دي.