تاند- د بولیویا امنیتي چارواکو د خپل هیواد په یوه پوځي مرکز کې غونډه وکړه چې د مخدرو موادو د کشف په برخه کې د شویو هلوځلو ستاینه وکړي.
خو په دې مراسمو کې پولیس او سرتېري نه بلکې د هغو سپو ستاینه وشوه چې د بولیویا د پولیسو ترڅنګ مخدر مواد مومي.
د هغو ۲۰۱ سپو په منځ کې، چې د بولیویا پولیسو روزلي دي، ۱۵ د ډېر ښه خدمت په خاطر وستایل شول.
یوه سپي، چې (یوشیرو) نومېږي، له خپل روزونکي مارتین اپازا ماماني سره سږ کال د مخدرو موادو څو قاچاقبر ونیول.
د یوشیرو روزونکي رویټرز خبري اژانس ته وویل:
«زما سپي یوشیرو یوځل ۸ کیلو کوکایین او یو وار بل ۷ کیلو کوکایین کشف کړل او پرون یې هم هانګ کانګ ته وړل کېدونکي کوکایین وموندل.»
بولیویا د پولیسو لپاره هر کال ۵۰ سپي روزي او د هر سپي پر روزلو نژدې ۳ زره ډالره لګښت کېږي.
د هر سپي د کار موده له ۵ تر ۷ کالو پورې دوام کوي.
لس تکړه مخدر مواد موندونکي سپي