تاند- د تاجکستان د ملي امنیت دولتي کمېټه وايي چې د طالبانو او د ازبکستان د اسلامي حرګت یو شمېر وسله وال غړي له افغانستان سره د تاجکستان پولو ته نژدې په اډو کې راټول شوي دي.
د تاجکستان خبري رسنیو نن د دغه هیواد د امنیتي چارواکو په قول وویل چې د دغه هیواد وسله وال پوځ د دې په ترڅ کې چې د سختدریځو د احتمالي حملې په وړاندې تیارسی شوی او ځینو کمزورو سرحدي سیمو ته یې ځواکونه لېږلي، روسي چارواکو ته هم خبر ورکړی دی.
په وروستیو کې د افغانستان لپاره د روسیې ځانګړي استازي ضمیر کابلوف د افغانستان او د منځنۍ اسیا د هیوادونو په پولو کې د وسله والو سختدریځو د اډو خبره کړې وه او ویلي یې و چې یوه اډه د تاجکستان په پوله کې جوړه شوې او بله د ترکمنستان په پوله کې.
د کابلوف په وینا نژدې ۵ زره سختدریځي د تاجکستان پولې ته نژدې په اډو کې ځای پر ځای شوي او تر ۲ زره زیات نور د ترکمنستان په پوله کې دېره شوي دي.
ترکمنستان هم په وروستیو کې ویلي و چې ځواکونه یې له طالبانو سره مخامخ شوي دي.
د کابلوف په وینا د افغانستان او منځنۍ اسیا د پولو ترمنځ په اډو کې هره میاشت د منځنۍ اسیا د بېلابېلو هیوادونو تر یو نیم سل زیات سختدریځي روزل کېږي.
کابلوف ویلي چې دا کسان نه یوازې د پیسو لپاره بلکې د ایدیالوژیکو هدفونو لپاره دغو اډو ته ځي او هلته جنګي زده کړې کوي.
د افغانستان لپاره د روسیې خاص استازي دا هم ویلي چې دا کسان پسرلي ته انتظار دي څو هوا توده شي او حملې پیل کړي.