تاند، پنجشنبه، د عقرب ۱۶مه: افغان چارواکي وايي، نن سهار له جرمني څخه کابل ته په یو پرواز کې ۳۶ افغان راشړل شوي کډوال رارسېدلي دي.
دا له ۲۰۱۶ راهیسې په جرمني کې د نامنل شویو افغانانو ۲۹مه جوپه ده چې کابل ته رالېږدول کېږي.
تر اوسه له جرمني څخه ۷۵۶ افغان کډوال راشړل شوي دي چې په اړه یې د بشري سازمانونو نیوکې هم زیاتې شوې دي.
همدا تېره ورځ د بشري حقونو سازمان پراوازول ویلي وو، چې د جرمني لخوا ناامن افغانستان ته د کډوالو ستنولو دوام هیښوونکی کار دی.
په افغانستان د پراوزول سازمان لخوا د ناامنه هېواد نوم په داسې حال کې ایښودل شوی چې سږ کال د ملګرو ملتونو د راپور له مخې تر دې دمه ۲۵۰۰ تنه ملکي افغانان په بریدونو او جګړو کې وژل شوي او ۵۶۰۰ نور ژوبل دي.