تاند- د پاکستان صدراعظم نوازشریف نن /شنبه/ ډګرجنرال قمر جاوید بجوه د راحیل شریف پر ځای د پوځ نوی لوی درستیز وټاکه.
ډګر جنرال بجوه به د نوومبر له ۲۹ /سې شنبې/ څخه، چې د راحیل شریف درې کلنه کاري دوره بشپړېږي، رسماً په کار پیل وکړي.
د بجوه له ټاکل کېدو سره به د پوځ او ملکي حکومت ترمنځ ترینګلتیا ختمه شي.
لوی درستیز په پاکستان کې د پوځ تر ټولو جګپوړی چارواکی ګڼل کېږي.
د دغه هیواد په ۶۹ کلن تاریخ کې اکثره وخت واک د پوځ په لاس کې پاتې شوی دی.
د پاکستان صدراعظم همداراز جنرال زبیر محمود حیات د هیواد د لوی درستیزانو د کمېټې درستیزوال ګومارلی.
د جنرال حیات د واک په دایره کې د پاکستان اتومي وسله هم شاملېږي.