تاند، دوشنبه، د اسد ۷مه: افغان سولې لپاره د امریکا ځانګړي استازي زلمي خلیلزاد که څه هم د امرالله صالح پر دفتر ډله ییز ځانمرګی برید په کلکو ټکو غندلی خو زیاته کړې یې ده چې ډېر ژر به قطر کې له طالبانو سره د خبرو نوی پړاو پيل کړي.
تر اوسه د صالح پر دفتر د برید مسوولیت چا نه دی اخیستی خو خلیلزاد پر خپل ټویټر ویلي دا برید خورا ریشخندي او واضح ترهګریز فعالیت و: (( زه دا برید غندم او غوښتنه کوم چې عاملان یې باید ژر مجازات شي، موږ د ترهګرۍ ضد جګړه کې له افغانانو سره ولاړ یوو.))
خو نوموړي دغه راز د سولې عالي شورا له مشر کریم خلیلي سره لیدنه کې ژر تر ژره د قطر د مذاکراتو بل پړاو د پيلیدو خبر ورکړی دی.
نوموړي هیله ښودلې چې دا خبرې به افغانستان کې یوې پایداره سولې ته لار پرانیزي.