تاند- د افغانستان لپاره د امریکا د بهرنیو چارو وزارت ځانګړی استازی زلمی خلیلزاد وايي چې پخوا امریکا له طالبانو سره د خبرو لپاره د افغانستان د اساسي قانون د منلو په شان ځینې وارمخکې شرطونه لرل خو اوس د ده ماموریت دا دی چې د افغانستان د حکومت او طالبانو ترمنځ د سولې موافقه ممکنه شي.
په تېرو کلونو کې امریکا او د افغانستان حکومت له طالبانو سره د سولې او پخلاینې شرط دا باله چې طالبان باید د افغانستان اساسي قانون ومني، له تروریستي ډلو سره اړیکې وشلوي او جګړه بس کړي.
خو په وروستیو څو کلونو کې نه امریکایان او نه هم د افغانستان حکومت د دغو شرطونو یادونه کوي.
خلیلزاد، چې د امریکا له ملي راډیو (این پي آر) سره خبرې کولې، په عین حال کې وویل چې په افغانستان کې د امریکايي پوځیانو حضور د دې هیواد له شرایطو سره تړلی دی او د امریکا هدف دا نه دی چې په افغانستان کې پوځي حضور ولري بلکې مهم هدف دی او هغه (هدف) په افغانستان کې د تروریزم خاتمه ده.
خلیلزاد په ضمني ډول وویل چې که طالبان هغه عوامل له منځه یوسي چې له کبله یې امریکا خپل پوځیان افغانستان ته راوستي دي، امریکایان وځي:
«د داسې شرایطو برابرول چې په افغانستان کې د امریکايي پوځیانو شتون ته اړتیا پاتې نه شي، د طالبانو او نورو افغانانو مسوولیت دی.»
ده د افغانستان اوسني امنیتي حالات تر پخوا ستونزمن وبلل او ویې ویل چې طالبان تر پخوا غښتلي شوي دي.