تاند، جمعه، د سنبلې لومړۍ: د ننګرهار د خوږیاڼو ولسوالۍ په بازار کې نن د جمعې په سهار یوې ماین چاودنې یو ملکي وژلی او ۹ نور ټپيان دي.
مسوولان وايي، دا یو ځای پر ځای شوی ماین وو چې ملکي وګړي په کې په نښه شوي دي.
د ننګرهار د والي ویاند عطا الله خوږیاڼی وايي، ټپیان د ننګرهار ولایتي روغتون ته رسول شوي چې له منځه یې د دوه کسانو روغتیايي وضعیت ښه نه دی.
تر اوسه کومې ډلې د دې چاودنې مسوولیت نه دی اخیستی، خو ننګرهار هغه ولایت دی چې داعش او طالب ډله په کې ډیری مهال دا ډول بریدونه ترسره کوي.
همدا څو ورځې وړاندې د خپلواکۍ د سلمې کلیزې په ویاړ جشنونو باندې دغه ولایت کې ۱۲ بمي چاودنې وشوې چې تر ۷۰ زیات په کې ټپیان شول.
ملګري ملتونه په خپل وروستي راپور کې وايي، د دولت د مخالفانو لخوا د ماینونو په چاودنو کې تر ټولو زیات ملکي وګړي تلفات ویني.