تاند، شنبه، د قوس ۳۰مه: د ارزګان پوهنتون د ښوونې او روزنې پوهنځي د فزیک څانګې محصلینو شپني دوربینونه، ریموټ کنټرول الوتکې، مایکروسکوپونه او نور ګڼ شیان جوړ کړي دي.
د دغه پوهنتون چارواکي وايي، په دې تړاو یې وړمه ورځ یو نندارتون هم جوړ کړی و چې محصلینو په کې په خپل لاس جوړ کړي شپني دوربینونه، ریموټ کنټرول الوتکې، ریموټ کنټرول موټرونه، بایسکلونه، لوډسپیکرې، سکواټور، الکتروسکوپونه، مایکروسکوپ، واړه جنراتورونه او نور ګڼ اختراعات نندارې ته ایښي وو.
د ارزګان د ښوونې او روزنې پوهنځي رئیس حیات الله څار په دې اړه تاند ته وویل، محصلینو یې په ډېرو کمو او نشتو امکاناتو سره اختراعات کړې دي چې دا یې د راتلونکې په اړه ښه زېری دی.
نوموړی وايي، هڅه به وکړي چې د نورو پوهنتونونو له محصلینو سره د ارزګان د محصلینو د علمي تجربو او څېړنو د شریکولو په خاطر سیالۍ ترتیب کړي.
د دغه پوهنځي د فزیک څانګې یو استاد شمس الله شفق هم تاند ته د خپلو محصلینو په اختراعاتو خوښي وښودله چې په نشتو امکاناتو یې خپلې علمي تجربې بریالۍ ثابتې کړې.
نوموړي له مرکزي حکومت څخه غوښتنه وکړه چې د ارزګان پوهنتون کې دې د لا ډېرو علمي څانګو د فعالولو لپاره ورسره مرسته وکړي، تر څو د محرومو سیمو محصلین په اسانۍ سره علمي تجربې لاسته راوړلی شي.
د ارزګان پوهنتون چې دا مهال له وزارت سره د ارزګان د لوړو زده کړو موسسې په نوم ثبت ده تر اوسه د کرهڼې، ښوونې او روزنې او کمپیوټرساینس پوهنځي لري او د نورو پوهنځیو د جوړولو لپاره یې لا اقدام نه دی شوی.
مننه
خو کاش چې ددې نندارتون او نویو اختراعاتو یوه مختصره ویډیو مو هم نشر کړې وه
افغانان د خپل کلتور ، مذهب ، خاوری ، ازادی سره په څنګ کښي ډیر ذکی دی دوی کولای شی چی د افغانستان پر مخ تګ کښي پخپلو ذکیتوب سره فوق العاده رول ولوبوی که دوی ته موقع ورکړۍ شی او دا امکانات یوازی او یوازی په یوه ملی حکومت کښی تر لاسه کیدای شی!!! ذکی ځوانانو ویاړنه پر تاسو