د ازبکستان ولسمشر اسلام کریموف د ۷۸ کلونو په عمر ومړ

تاند- د ازبکستان ولسمشر اسلام کریموف، چې تېره اوونۍ یې مغزي سکته کړې وه، مړ شو.

رویټرز خبري اژانس د باوري سرچینو له قوله وايي چې ۷۸ کلن کریموف مړ شوی دی.

کریموف د پخواني شوروي اتحاد له پاشل کېدو وروسته د ازبکستان ولسمشر و.

نوموړی د اګست په اووه ویشتمه په روغتون کې بستري شو.

ویل شوي چې د ده د خښولو لپاره په سمرقند کې ترتیبات له پرون څخه پیل شوي دي. په دغه ښار کې لارې او کوڅې بندې دي او خلکو د تګ راتګ اجازه نه ورکول کیږي.

سمرقند د کریموف زېږنځای دی.

تراوسه پوري ازبکستان د خپل مشر مړینه رسماً نه ده اعلان کړې او دا هم څرګنده نه ده چې کریموف کله ساه ورکړه.

مخکې په ځینو ناتائید شوي راپورونو کې ویل شوي چې کریموف د اګسټ په ۲۹ نېټه مړ شوی دی.

په دې اړه شکونه هغه مهال زیات شول چې د کریموف د پلرني ټاټوبي سمرقند ښار په بېلابېلو سیمو کې د پاکولو چارې پیل شوي.

په همدې حال کې د قزاقستان ولسمشر نور سلطان نظربایف نن ازبکستان ته خپل سفر لغوه کړ.