تاند- د جنوبي اسیا د فوټبال د فدرېشن د ګولډ کپ په سیالیو کې به د افغانستان د فوټبال ملي لوبډله سبا د بوتان له ملي ټیم سره مخامخ شي.
د افغانستان د فوټبال ملي ټیم، چې تېره اوونۍ یې په کابل کې د پاکستان ملي لوبډله په یوه دوستانه مسابقه کې درې پر صفر ماته کړه، نیپال ته رسېدلی دی.
نیپال په ۲۰۱۲ کې د دغو سیالیو کوربه ټاکل شوی و.
ټاکل شوې ده چې افغان ټیم د بوټان ترڅنګ په بي ګروپ کې له سریلانکا او مالدیپ سره هم مسابقې وکړي.
په جنوبي اسیا کې فوټبال چندان وده نه ده کړې او د فوټبال ټیمونه یې کمزوري دي. یوازي هند نسبتاً غښتلی دی خو هند هم د اسیا په لومړی او دوهم درجه ټیمونو کې نه حسابېږي.
د جنوبي اسیا د فوټبال د فدرېشن د ګولډ کپ یا طلايي جام په سیالیو کې د اتو هیوادونو لکه پاکستان، نیپال، هند، بنګله دېش، افغانستان، سریلانکا، بوټان او مالدیپ ټیمونه برخه لري.