تاند- واشنګټن ټایمز امریکايي ورځپاڼه ادعا کوي چې د امریکا له لوري د افغانستان ملي اردو ته د پنخه سوه ملیون ډالرو په ارزښت شپاړس پېرودل شوې الوتکې په وروستیو کې ویجاړې کړای شوي څو وسپنې یې وپلوري.
ورځپاڼه وايي چې دا الوتکې چې د متحدو ایالتونو دفاع وزارت د افغانستان د هوايي ځواک لپاره اخیستې وې، د افغانانو له لوري ویجاړې کړای شوي او زړې ټوټې یې په خورا کمه بیه پلورل شوي دي.
د واشنګټن ټایمز ورځپاڼې د راپور له مخې د امریکا دفاع وزارت د افغانستان د هوايي ځواک لپاره ۲۰ (G222) ډوله ایټالیايي ترانسپورتي الوتکې په ۴۸۸ ملیون ډالره پېرودلې وې.
په افغانستان کې د امریکا د بیارغونې د چارو د څارنې لپاره د ځانګړي سرپلټونکي د څېړنو پر اساس دا الوتکې له دې کبله چې ښه نه چلېدې، د ساتنې په برخه کې یې ستونزې وې او د پرزو ستونزې یې لرلې د ۲۰۱۳ کال په مارچ میاشت کې په مځکه ولاړې پاتې شوې.
په راپور کې په دې باب څه نه دي ویل شوي چې امریکايي چارواکو ولي د افغانستان د ملي اردو لپاره داسي زړې او بېکاره الوتکې رانیولې وې.
په راپور کې ویل شوي چې د کابل په هوايي ډګر کې دا الوتکې یوه مودې همداسي ولاړې وې خو وروسته د افغانستان دفاع وزارت پرېکړه وکړه چې هغه ویجاړې کړي او زړې ټوټې یې وپلوري.
سیګار یا د امریکا د مرستو د څارونې سرپلټونکی وايي چې دفاع وزارت د دغو الوتکو هر کیلو وسپنه په نژدې ۱۲ سنټه پلورلې ده او تراوسه پوري یې ۱۶ الوتکې له منځه وړې دي.
په راپور کې دا هم ویل شوي چې د امریکا د مالیه ورکوونکو پیسې په افغانستان کې په دې ډول ضایع شوي دي.
د امریکا د مالیی پیسی خو افغانانو دا ډول ندی استعمال کړی لکه چی هغوی دوا کوی، دا خو امریکایانو په خبله د خپلو خلکو د مالیی پیسو سره ناوړه چلند کړی دی.که چیری امریکایانو سمی الوتکی افغانستان ته اخیسی وای نو افغانانو به نه کباړ کولی.