تاند، سه شنبه د جدي ۳مه: ولسمشر غني وايي، دا مهال له ۱۰۰ څخه د زیاتو ولسوالیو امنیه قومندانۍ ودانۍ نه لري او په دې امنیتي برخه کې سرچینې ضایع شوې دي.
ولسمشر تېره شپه په ارګ کې یو لړ مراسمو ته ویلي، د امنیتي برخې مصارف د تاسیساتو په تناسب د مقایسې وړ نه دي او باید چې په دې برخه کې سپما وشي او د امنیتي سکټور له بودیجې چې هر څه جوړېږي باید پایداره واوسي: (( باید په امنیتي سکټور کې هره مصرفېدونکې افغانۍ د سرباز، ساتنمن او بریدمل د نجات سبب شي او په امنیتي – دفاعي بنسټونو کې د لګښتونو سرچینې باید په اساسي ډول مدیریت شي.))
ولسمشر په داسې حال کې د سلو ولسوالیو د امنیه قومندانیو لپاره د ودانیو نشتون خبره کوي چې یوه میاشت وړاندې حکومت په داسې پنځه کلنه طرحه کار پیل کړی و چې له مخې یې د امنیتي او دفاعي ځواکونو د پنځوس سلنه غیرضروري اړتیاو د راکمولو باندې ټینګار کېږي.
د ولسمشر ویاند صدیق صدیق ویلي وو چې د دغې طرحې له مخې به هر کال د امنیتي سکټور لس سلنه بې ځایه مصارف راکمېږي چې په پنځو کلونو کې به ۵۰ سلنې ته ورسېږي.