د افغانستان کرکټ ملي لوبډلې د یونیسف له لوري په لاره اچول شوي ورکشاپ کې چې موخه یې دوی ته د ګوزڼ پر وړاندې مبارزې کولو مهارتونو ورښودل او د ماشومانو له حقونو څخه د دفاع کول وو، ونډه واخیسته.
دغه ورکشاپ چې نن سهار د افغانستان کرکټ بورډ په اداره کې په لاره اچول شوی وو، په قبایلي چارو کې د ولسمشر سلاکار وزیر او د افغانستان کرکټ بورډ عمومي رئیس شهزاده مسعود، په افغانستان کې د یونیسف نمایندګۍ سرپرستې ویدیا ګنیش، د افغانستان کرکټ بورډ ادارې چارواکو، د ملي لوبډلې غړو او د رسنیو همکارانو په ونډه درلودله.
په قبایلي چارو کې د ولسمشر سلاکار وزیر او د افغانستان کرکټ بورډ عمومي رئیس شهزاده مسعود رسنیو ته داسې ووییل، “روغتیا د یوې ټولنې تر ټولو ستره اړتیا ده او ملي لوبغاړي د یوې ټولنې ملي اتلانو په توګه ددغې سترې اړتیا تر پوښښ لاندې راوستلو کې ستر مسئولیت او دروند رسالت په غاړه لري. ملي لوبډله د ډیرو نورو ملي مسایلو ترڅنګ نن د ګوزڼ پر وړاندې مبارزې ته ټټر وهي او د لوی خدای ج په مرسته به دوی په دغه برخه کې هم خپل دروند رسالت په خورا مسئولیت سره په ډاګه کړي”.
په افغانستان کې د یونیسف نمایندګۍ سرپرستې ویدیا ګنیش هم په خپل وار سره داسې ووییل، “د افغانستان کرکټ ملي لوبډله یوه پیاوړې او پرمختلونکې لوبډله ده. زه په دغه لوبډله کې د ډیر ستر مسئولیت ترسره کولو ځواک وینم. زموږ نننۍ ناسته د ګوزڼ ناروغۍ پر وړاندې مبارزې لپاره یو ستر ځواک تشکیلوي چې رهبري به یې د کرکټ همدغه اتلان په غاړه لري. موږ د کرکټ بورډ له ادارې سره له کړې هوکړې راضي یو او ویاړو چې له ورته پرتمینو شخصیتونو سره اوګه په اوګه د ګوزڼ ناروغۍ او د ماشومانو له حقونو څخه د دفاع لپاره کار کوو”.
په دغه ورکشاپ کې ملي لوبډلې ته د ګوزڼ پر وړاندې مبارزې ټول اړخونه تشریح او دوی ددغه ستر بشري ناورین پر وړاندې بشپړې مبارزې ته لپاره چمتوالی وښود.