تاند- د پاکستان ډان ورځپاڼې نن /یکشنبه/ راپور ورکړ چې په افغانستان کې د امریکا د پوځ لپاره د سمندر له لارې د کراچۍ بندر ته تر ۶۰۰ زیات پوځي وسایط رسېدلي دي.
ورځپاڼه وايي چې دا نقلیه وسایل، چې په افغانستان کې به د امریکا پوځ ته وسپارل شي، له یوې نسبتاً اوږدې مودې وروسته دغه بندر ته رسېږي.
ډان د رسمي اسنادو پر اساس وايي چې دا نقلیه وسایط له یو شمېر نورو وسایلو سره د امریکا مریلنډ ته نژدې له ویلمینګټن بندره په ایم وي ګلوفیس سن بېړۍ (MV Glovis Sun) کې د کراچۍ تر بندره رارسول شوي او تېره میاشت په کراچۍ بندر کې کښته شول.
ورځپاڼه وايي چې د راوړل شویو ټرکونو او نورو نقلیه وسایطو د ډول او څرنګوالي په اړه یې معلومات نه دي ترلاسه کړي خو د کراچۍ بندر مامورین وايي چې هاموې زغرګاډي دي چې په افغانستان کې د امریکا پوځ ورڅخه ډېر کار اخلي.
د بندر مامورینو تایید کړه چې تر دې ۶ میاشتې پخوا هم د کراچۍ بندر له لارې په افغانستان کې د امریکا د پوځ لپاره یو شمېر کوچني هاموې زغرګاډي راوړل شوي ول.
دا نقلیه وسایط وروسته له دې رالېږل کېږي چې د امریکا حکومت افغانستان ته د نورو ځواکونو د رالېږلو پرېکړه وکړه.
تراوسه پورې په دې اړه وروستۍ پرېکړه نه ده شوې چې د امریکا دفاع وزارت به افغانستان ته څومره نور ځواکونه راولېږي خو ویل کېږي چې د ۳ زره او ۴۵۰۰ ترمنځ به وي.
سره له دې چې د امریکا او ناټو اکثره ځواکونه په ۲۰۱۴ کال له افغانستانه ووتل او ټاکل شوې وه چې نور هم ووځي، خو طالبانو جګړې ته لا زور ورکړ. ویل کېږي چې د طالبانو د حملو د شدت له کبله امریکا مجبوره شوه چې نه یوازې پاتې ۸۴۰۰ سرتېري ونه باسي بلکې نور هم راولېږي.