تاند – د امریکا د متحده ایالاتو لومړنی ستورمزلی جان ګلېن نن /د ډسمبر په ۹مه/ د ورپېښې ناروغۍ له امله ساه ورکړه.
جان ګلېن په اوهایو ایالت کې د کولمبوس د سرطاني ناروغانو په روغتون کې له یوې اونۍ نه ډېر بستر څخه وروسته مړ شو.
ښاغلی ګلېن هغه وخت د امریکایانو لپاره په ملي اتل بدل شو چې په ۱۹۶۲ کال کې د ځمکې له مدار نه ووت او فضا ته والوت. تر ده مخکې روسي یوري ګاګارین په ۱۹۶۱ کال کې فضا ته الوتنه کړې وه.
د یادونې وړ ده چې د ۱۹۸۸ د اګست په ۲۹مه افغان ستورمزلي او ملي اتل عبدالاحد مومند هم د شوروي اتحاد له یوه فضایي ماموریت سره یوځای فضا ته الوتنه وکړه او ځمکې ته له بېرته راستنېدلو څخه مخکې یې د میر په فضایي سټېشن کې ۹ ورځې وخت تېر کړ.
ویل کیږي چې جان ګلېن د امریکایانو لپاره په دوه لویو جګړو کې برخه اخیستې وه، پیلوټ وو، د دغه هېواد د چټکې الوتنې ریکارډ یې درلود او ۲۴ کاله د متحده ایالاتو د مشرانو جرګه کې د اوهایو سناتور وو. جان ګلېن په ۱۹۸۴ کال کې د دیموکراتانو د ګوند په استازیتوب د ولسمشرۍ ترلاسه کولو لپاره سیالي هم وکړه خو پاتې راغی.