تاند، چهار شنبه، د دلوې ۲مه: د افغانستان د ملکي هوايي چلند اداره تاند ته وايي، د ایران او امریکا تر لانجې او د اوکراینۍ الوتکې تر راغورځېد وروسته پر افغان فضايي مسیر د الوتکو پروازونه زیات شوي چې ورسره د دوی عایدات د ورځې ۱۰۰ زره ډالرو ته لوړ شوي دي.
دغې ادارې د اوکراینۍ الوتکې د راغورځېدو له پېښې څو ورځې وروسته تاند ته خبر ورکړی و چې د افغانستان په حریم د پروازونو شمېر ۴۰۰ ته لوړ شوی او عایدات یې هم د ورځې ۷۰ زره ډالر پورته تللي دي.
خو اوس د یادې ادارې مشر محمد قاسم وفايي تاند ته په تلیفوني تماس کې وايي، په دې برخه کې د ورځې ۳۰ زره ډالر عایدات نور هم زیات شوي او د ورځنیو عایداتو کچه یې ۱۰۰ زره ډالرو ته رسېدلې ده.
نوموړی د عایداتو د زیاتیدو علت دا ښيي چې د افغانستان په مسیر مطمئین ورځني پروازونه له ۴۵۰ اوښتي او دوی له هر پرواز څخه ۷۰۰ ډالر اخلي چې ورځني عایدات یې ۱۰۰ زره ډالر اضافه شوي دي: (( که دا دوام وکړي زموږ د فضايي حریم او مسیر نه به ترلاسه کیدونکو عوایدو کې ۳۰ میلیونه ډالر په کلني ډول اضافه شي.))
د وفايي زاده په خبره، د ایران هوايي مسیر له ۱۲ ورځو راهیسې تړل شوی او ټولو نړیوالو شرکتونو له دوی سره تماسونه نیولي دي چې افغانستان دې ورته مطمئین مسیر ورکړي.