تاند- د ایران د خواف او د افغانستان د هرات ترمنځ د رېلګاډي د پټلۍ اېښودلو کار نن په یو لړ مراسمو کې پیل شو.
د هرات والي محمد اصف رحیمي په دغه ولایت کې پټلۍ پر مځکه کېښوده.
د دې رېلارې په سلو کې ۹۰ برخه کار د ایران په خاوره کې بشپړ شوی دی او د افغانستان د برخې کار نن /چهارشنبه/ پیل شو.
دا رېلاره د ایران له خاورې د افغانستان د هرات ولایت غوریان ولسوالي ته غځېږي.
له غوریانه زنده جان ولسوالۍ او بیا د هرات هوايي ډګر ته رسېږي.
د غوریان او زنده جان ترمنځ د دې پټلۍ اوږدوالی، چې نن یې کار پیل شو، ۶۰ کیلومتره دی.
د خواف او هرات د اورګاډي ۱۴۲ کیلومتره اوږدوالی لري، چې ۸۰ یې د ایران او۶۰ په افغانستان کې جوړېږي.
په دې پروژه ایران ۲۰۰ ملیون ډالره لګوي.