تاند- د بریتانیا د بهرنیو چارو وزیر مارک فیلډ وايي چې د بریتانیا حکومت له نږدې د افغانستان وضعیت څاري او د دې هیواد د جګړې په اړه یې تحلیل دا دی چې طالبان دا جنګ نشي ګټلای. .
د بریتانیا د بهرنیو چارو وزیر زیاته کړه، د بریتانيا حکومت د طالبانو او افغان حکومت د سولې پر سیاسي جوړجاړي باور لري او دا د افغانستان د دوامداره ثبات او امنیت لپاره یوازینۍ حللاره بولي.
مارک فیلډ وړاندي وايي، طالبان باید د سولې له اوسني فرصته ګټه واخلي او د افغانستان له منتخب حکومت سره سپينې خبرې اترې پیل کړي.
فیلډ وايي، د بریتانیا حکومت، ناټو او نور متحدین، د افغانستان د حکومت او افغان ملي دفاعي او امنیتي ځواکونو ملاتړ ته همداسې ژمن پاتې کېږي. دا چاره له جګړو او ترهګریزو ډلو لکه القاعدې او د داعش له خراسان څانګې څخه د افغان وګړیو د خوندیتابه لپاره اړینه او مهمه ده.
فیلډ ټینګار کوي چې د افغانستان ننګه باید د دې ډاډ ترلاسه کولو لپاره وشي چې دا هېواد بیا د نړیوالو ترهګرو په پناه ځای نه اوړي.