تاند- (دوشنبه، د عقرب ۲۷) په بغلان ولایت کې نن سهار په یوه ترافیکي پېښه کې لږترلږه ۴۰ تنه ټپیان او یو تن مړ شوی دی.
د بغلان ولایت چارواکي وايي، یو ۴۰۴ ډوله بس د مرکزي بغلان په ساحه کې د کندوز سین ته ولوېده.
د بغلان د روغتون سرچینې وايي چې په ژوبل شویو کسانو کې ښځې او ماشومان هم شامل دي.
پرون د ننګرهار د کرنې رييس سمیع الله نصرت هم په یوه ترافیکي پېښه کې مړ شو.
افغانستان یو له هغو هیوادونو څخه دی چې ترافیکي پېښې پکې ډېرې کېږي او د ډېرو انسانانو ژوند اخلي.
د افغانستان د ترانسپورت وزارت د ترافیکو ملي اداره وايي چې په افغانستان کې د سږ کال (۱۳۹۸) په لومړیو ۶ میاشتو کې ۱۰۹۲ ترافیکي پېښې شوي چې تر ۵۰۰ ډېر کسان پکې مړه شوي دي.
د دې ادارې په وینا تېر کال شاوخوا ۱۰۸۳ ترافیکي پېښې شوې وې چې ټولټال ۶۶۵ تنه پکې مړه شوي او ۱۳۹۸ نور ژوبل شوي وو.
په مجموع کې د تېرو لسو کلونو په لړ کې په ترافیکي پېښو کې د وژل شویو کسانو اوسط د کال ۱۵۰۰ تنه ښودل کېږي.
ویل کېږي چې د لارو خرابوالی، له ترافیکي قوانینو سره د چلوونکو نه بلدتیا، د ترافیکي اشارو او نښو کموالی او د موټر چلولو په مهال د یو شمېر چلوونکو له لوري د چرسو په شان د مخدرو موادو استعمال د ترافیکي پېښو له زیاتوالي سره مرسته کړې ده.
پرون ملګروملتو د سړکونو د خوندیتوب د نړیوال اقدام غوښتنه وکړه. ملګروملتو د ترافیکي پېښو د قربانیانو د یاد د نړیوالې ورځې په مناسبت په یوه راپور کې وویل چې نژدې په هره نیمه دقیقه کې په نړۍ کې یو تن په ترافیکي پېښه کې ژوند بایلي.