تاند، دوشنبه، د عقرب ۲۰مه: د افغانستان د بهرنیو چارو وزارت په کابل کې د هند سفیر ویني کمار ورغوښتی او د پاني پت فلم کې د احمدشاه ابدالي بابا د توهین په تړاو یې ورسره اندېښنه شریکه کړې ده.
د بهرنیو چارو وزارت ویاند ګران هېواد ته تایید کړه چې د وزارت د سرپرست ادریس زمان او سفیر ویني کمار تر منځ د دوه اړخیزو اړیکو د پیاوړتیا تر څنګ د پاني پت فلم په تړاو د کابل اندېښنې هم شریکې شوې دي.
دا په داسې حال کې ده چې نن په ولسي جرګه کې هم د پاني پت فلم په تړاو د وکیلانو لخوا اندېښنې شریکې شوې او ویل شوي چې په دې هندي فلم کې احمدشاه ابدالي بابا ته توهین شویدی.
پاني پت فلم چې د نومبر په ۶مه یې لنډه کۍ نمونه يي ویډیو نشر شوې، ټاکل شوې چې د ډسمبر په ۶مه ټول فلم نندارې ته کېښودل شي.
دا فلم د امپراتور احمدشاه ابدالي او د هند د مرهټه قوم تر منځ د پاني پت په جګړه کې د سترې جګړې کیسه ده چې له ځینو صحنو یې معلومېږي احمدشاه بابا ته په کې توهین شوی دی.