تاند، جمعه، د ثور ۱۹مه: د بې پولې خبریالانو نړیواله ټولنه وايي، د افغان حکومت لخوا خوشې کېدونکو طالبانو په لیست کې باید هغه کسان خوشې نشی چې په خبریالانو د تاوتریخوالي او بریدونو یا د هغوی د وژنې عاملین دي.
دغه سازمان په یوه اعلامیه کې نن جمعه ویلي، چې راپورونه يې ښيي افغان حکومت د لیل الدین په نوم هغه خطرناک طالب بندي هم خوشې کوي چې د کابل زنبق څلورلارې برید یې طراحي کړی و.
دغه سازمان وايي، په هغه برید کې د رسنیو درې کارکوونکي، یو خبریال وژل شوی او د یک په نوم خصوصي تلویزون ته یې مالي صدمه هم رسولې وه.
د بې پولې خبریالانو سازمان خبرداری ورکړی چې د سولې هوکړه باید د جنګي جنایتونو د بخښلو سبب نشي.
په افغانستان کې د بې پولې خبریالانو د دفتر مشر رضا معیني ویلي، پر خبریالانو د بریدونو ټول عاملان باید مجازات شي او د ټولو قربانیانو کورنیو ته باید عدالت ورسول شي.
نوموړي ویلي، که حکومت د طالبانو هغه بندیان خوشې کوي چې د خبریالانو قاتلان دي نو دا په افغانستان کې د بیان پر ازادۍ د بندیز لګېدلو په معنا دي: (( د عدالت له پامه غورځول پایداره اوعادلانه سوله نه شي راوستلی.))
د بې پولې خبریالانو سازمان همداراز ویلي، د سولې له هوکړې وروسته د طالبانو بریدونه نه یوازې زیات شوي بلکې ځینې خبریالان او د رسنیو مسوولان هم د طالبانو لخوا احضار شوي دي او خبرداری یې ورکړی چې د خپلو رسنیو ځینې فعالیتونه ودروي.
دا په داسې حال کې ده چې افغان حکومت د ښه نیت په خاطر تر اوسه د طالبانو ۹۳۳ بندیان خوشې کړي دي.
پر حکومت نیوکه او ولسي فشار دی چې د سولې لپاره دې بې سنجشه اقدامات نه کوي او طالبانو ته دې د بشري جرایمو په پېښو کې ښکیل طالبان نه ورخوشې کوي.