تاند- په سعودي عربستان کې د حج د مراسمو پر وخت څه باندې دوه ملیونه زیارت کوونکي ځینې وخت له ستونزو سره مخامخ وي.
یوه له دې ستونزو د اوسېدو ځای دی.
سعودي پانګوال اوس هڅه کوي چې کرار کرار دا ستونزه هم هواره کړي.
د حج د زیارت کوونکو د اوسېدو د ستونزو د هواري یوه لاره د خوب کوچنۍ او په مډرن سیسټم جوړې شوې کوټې دي.
د دغو وړو خوب خونو دروازې په کارت خلاصیږي او زیارت کوونکي په ارام زړه پکې اوسیدلی شي.
په دې کوټو کې له یوې خوا د زیارتوالو محرمیت خوندي وي او له بلې خوا بل څوک ورتلای نه شي نو زیارتوال په ډاډه زړه جامې پکې بدلولی شي او یو کوچنی قاتېدونکی مېز هم لري.
د هدیه په نوم شرکت دا کوټې جوړوي او وايي چې سږ کال یې په ازمیښتي توګه یو شمېر زیارت کوونکو ته د خوب دا کوټې ورکړي دي.
دا په داسې حال کې ده چې تراوسه پورې زیارت کوونکي په خیمو کې اوسېدل چې په درو مهمو ځایونو کې درول کېدې. هره خیمه د ۱۰ تنو لپاره وي خو ډېر زیارت کوونکي پکې ډاډه نه وي.
په خیمو کې زیارتوال یا پر توشکونو او یا تختونو ویدېږي.