تاند- د افغانستان ولسمشر محمد اشرف غني نن /پنجشنبه/ د ګلبدین حکمتیار له اسلامي حزب سره د سولې موافقه لاسلیک کړه او له امریکا او ملګروملتو یې وغوښتل چې د حکمتیار ګوند له تور لیسته وباسي.
ګلبدین حکمتیار د ویدیو لینک له لارې د سولې موافقه لاسلیک کړه. د سولې د موافقې د لاسلیک مراسم او په دې مناسبت ویناوې له تلویزیونه په مستقیم ډول خپرې شوې.
دا له ۲۰۰۱ م کال را په دې خوا له یوې ډلې سره د افغانستان د حکومت د سولې لومړنۍ موافقه ده.
اسوشیتید پریس خبري اژانس وايي، نړیواله ټولنه له حکمتیار سره د سولې د موافقې په دې خاطر هم هرکلی کوي چې دا جوړجاړی به له طالبانو سره د پخلاینې لار هواره کړي.
د نړیوالو بندیزونو له لېري کېدو وروسته به حکمتیار کابل ته ستون شي.
حکمتیار: خپل هدف د سولې له لارې ترلاسه کولی شو
حکمتیار په خپله وینا کې د افغانستان له ګاونډیو هیوادونو وغوښتل چې د افغانستان په جنګ کې د ګټو په لټه کې ونه اوسي.
ده روانه جګړه د افغانانو په تاوان وبلله، ویې ویل چې د افغانستان جګړه د بهرنیانو د ګټو لپاره روانه ده.
ده په ځانګړي ډول د کوم بهرني هیواد نوم وانخیست خو د ګاوډیو هیوادونو یادونه یې وکړه چې ظاهراً یې اشاره پاکستان او ایران ته وه.
حکمتیار په خپله وینا کې هیله څرګنده کړه چې داسي ورځ راشي چې بهرني هیوادونه د افغانستان په چارو کې لاسوهنه بس کړي او مضبوطه سوله او ثبات ټینګ وي.
ده وویل، د افغانستان له حکومت سره د اسلامي حزب د سولې موافقه د خبرو له لارې حاصله شوه او بهرنیانو په دې پروسه او خبرو کې هیڅ لاس نه درلود.
حکمتیار په نورو وسله والو ډلو هم ږغ وکړ چې مسایل د سولې د خبرو له لارې حل کړي.
حکمتیار وویل، کله چې په سلو کې۹۰ بهرني پوځیان له افغانستانه ووتل، د سولې هلې خلې یې پیل کړې.
ده وویل، ګوند یې هیله لرله چې امریکايي پوځیان به په روان ۲۰۱۶ م کال کې له افغانستانه ووځي خو سپینې ماڼۍ خپل پلان بدل کړ.
ده تاکید وکړ چې د ولسوالیو په نیولو او لاس په لاس کېدلو مسایل نه حل کېږي او یوازې د افغانانو ترمنځ په خبرو هیواد ته سوله او ثبات راتلای شي.
حکمتیار طالبانو ته څو ځلي په مستقیم او غیر مستقیم ډول بلنه ورکړه چې خپل هدف د سولې له لارې هم ترلاسه کولی شي.
ده له ولسمشر غني وغوښتل چې د ملا محمد رسول له ډلې سره د سولې خبرې وکړي.
غني: زما او حکمتیار د نسل دنده د جنګ بندول دي
مرامسو ته ولسمشر غني وویل: «زما او حکمتیار صاحب د نسل مشترکه وظیفه دا ده چې جنګ متوقف شي او افغانستان د پردو له احتیاجه راوباسو او په خپلو پښو یې ودروو. د جنګ اور کشر نسل او اوسنو ځوانانو نه دی بل، بلکې څو لسیزې پخوا بل شو او د دې اور د ختمولو وظیفه هم تر ډیره حده د مشر نسل په غاړه ده.»
ده زیاته کړه«زموږ اساسي قانون د افغانستان خلکو ته حق ورکوي چې د عمومي انتخاباتو له لارې د قدرت انتقال تر سره شي، نه د جنګ او خونریزي له لارې. زموږ اساسي قانون ټولو وطنوالو ته که هغوی ښځې دي، یا نارینه، د کار، تعلیم، سیاسي فعالیت او د خپل نظر د بیان حق ورکوي او د هیواد د ټولو اوسېدونکو اساسي حقونه تضمینوي. که هر څوک هر سیاسي مشکل لري، د هغه د حل کولو لپاره سیاسي لارې چارې موجودې دي. ځکه خو وایم چې د سولې دغه موافقه چې د افغانستان اساسي قانون پکې محوري حیثیت لري، د تطبیق وړ ده او سر له همدې شیبې به یې د تطبیق په لور اقدامات پیل کیږي.»
د افغانستان ولسمشر همداراز وویل«له حزب اسلامي سره د سولې د موافقې یو ډیر مهم خصوصیت دا و او دا دی چې د افغانستان اساسي قانون پکې د محور حیثیت درلود. په دې موافقه لیک کې داسې هیڅ نکته نشته چې د افغانستان له اساسي قانون سره په ټکر کې وي. زه د دې موافقې په تطبیق باندې ځکه باور لرم چې د اساسي قانون په چوکاټ کې او د اساسي قانون له غوښتنو او ارزښتونو سره کاملا هماهنګه ده.»
ده همداراز وویل«په وروستیو میاشتو کې د سولې دغه هڅې په داسې وخت کې تیزې شوې او نهایي شکل یې خپل کړ چې په افغانستان کې متاسفانه تحمیلي جنګ ډیر شدید و. د جنګ د شدت په وخت کې د سولې د هڅو لا زیاتول د دواړو خواوو د ټینګ عزم او تدبیر نماینده ګي کوي».
Looking forward for a secure Afghanistan may Allah bring full peace to our beloved soil Afghanistan
هغه څوک چې افغان ملت ته سوله غواړي او راولي ئې سرلوړي دې وي۰ تل دې وي زمونږ ګران هیواد افغانستان۰