د چهارشنبې په ورځ د یو لړ ځانګړو مراسمو په ترڅ کې دخوست ولایت په اداري کمپلېکس کې د غونډو او کنفرانسونو په موخه ددوه پوړیز صالون د بنسټ ډبره کېښودل شوه چې ساختماني چارې به یې د اته ویشت مېلیونه افغانیو په لګښت په (۱۲) میاشتو کې سرته ورسیږي .
خوست والي پوهنمل حکم خان حبیبي جوړو شویو مراسمو ته د تالار په اړتیا خبرې وکړې .ده وویل دا یوه اړتیا وه چې باید په کمپلېکس کې یو ځانګړی تالار جوړ شي ترڅو په هغې کې د ملي او مذهبي ورځو لمانځغونډې ترسره شي .
دنوموړي په وینا دغه تالار په دوو پوړونو کې جوړ یږي چې په لومړني پوړ کې به د یوشمېر اړینو ملحقاتو ترڅنګ د (۳۲۰) کسانو لپاره د خوراک صالون او په دویم منزل کې به د جلساتو لپاره د ځانګړي خونې ترڅنګ د (۴۰۰) کسانو لپاره ستر صالون جوړ شي .
خوست والي پوهنمل حکم خان حبیبي د ښاري پراختیا وزارت له رهبرۍ مننه وکړه چې په خوست ولایت کې یې د نوموړي سره دخپلو ژمنو په ترڅ کې د تالار جوړولو وعده یې سرته ورسوله .دنوموړي په خبره د ښاري پراختیا وزارت وزیر دا لومړنۍ ژمنه نده چې په خپل وخت یې ترسره کوي ، بلکې له دې وړاندې یې د ځانګړو مسلکي ټيمونو پواسطه دخوست په ښار کې د پاکو اوبو د شبکې په جوړولو او په یو شمېر ولسوالیو کې د ښار ګوټو په سروې او نقشو عملي کار کړی دی .ده هیله وښوده چې د ښاري پراختیا وزارت په خاصه پاملرنه دخوست ښار ته د اوبو رسونې پروژه هم منظوره او عملي کارونه یې پیل شي.
ښاغلي حبیبي زیاته کړه چې په ولسوالیو کې د ښارګوټو په جوړولو سره به دخوست په ښار اوسنی فشار کم شي او له بل پلوه به د ولسوالیو اوسېدونکو ته د سوداګرۍ او راکړې ورکړې په برخه کې په خپلو ولسوالیو کې اړین سهولتونه رامنځته شي .(کلیپ)
خوست والي د اړونده ادارې وغوښتل چې د پروژې له کارونو په دوامداره توګه نظارت وکړي او هېڅ وخت چاته ددې موقع ورنه کړي چې کارونه په ټيټ کیفیت سرته ورسوي .
د ولایتي شورا ریس عبدالولي واحدزي پدې خوښي څرګنده کړه چې په خوست کې د بیارغونې کارونه ګړندي شوي دي .دده په خبره په خوست ولایت کې د پرلپسې پروژو پیلېدل ا وډاډمن امنیت ددې مانا ورکوي چې پدې ولایت کې سالمه رهبري،ښه همغږي او د ولسونو همکاري موجوده ده .
قومي مشر محمدقیوم خان وویل دخوست ولسونه د ولایتي ادارې هڅې ا ولاسته راوړنې ستایي او په کلکه ورڅخه ملاتړ کوي . نوموړي په قرارداديانو غږ وکړ چې د پروژو د تطبیق پرمهال دې له افغاني احساسه کار واخلي او د کیفیت برخې ته دې خاصه پاملرنه وکړي .
د مراسمو په وروستۍ برخه کې د پروژې ساختماني چارې د بنسټ د ډبرې په کېښودو سره رسماً پيل شوې .
د ولایت مقام مطبوعاتي دفتر
۱۳۹۵-۶-۱۷