تاند- څېړونکو د لومړي ځل لپاره د خځلو د ري سایکل کولو یا بیا موندلو لپاره داسې روباټ جوړ کړی چې لامسه حس لري.
د دې روباټ په لاسونو کې څو سینسرونه ایښودل شوي چې د هغو په وسیله کاغذ او پلاستیک تفکیک کولی او سره جلا کولی شي.
دا روباټ د ماساچوسیټ د ټکنالوژۍ انستیتیوت څېړونکو جوړ کړی دی.
د کثافاتو یا خځلو سره جلا کول او ري سایکل کول یو لوی چلینج دی.
د خځلو په منځ کې د پلاستیک، کاغذ اونورو شیانو سره بېلول ډېر ستونزمن کار دی خو د دې نوي روباټ جوړېدا به انسانان له دې ستومانوونکي او په عین حال کې خطرناک کاره خلاص کړي.
دا روباټ (RoXycle) نومېږي او په خپلو لاسونو کې د موجودو سینسرونو په مرسته د هر شي ماهیت تشخیص کولی او بیا په کته ګوریو وېشلی شي.
د روباټ یو سینسر د شي اندازه معلومي، دوه نور د شي د نرموالي اندازه ټاکي. په دې ډول د کاغذ، پلاستیک او نورو شیانو ترمنځ توپیر کوي.
دا روباټ حتي وسپنه او نور فلزي شیان هم پېژندلی شي.