تاند- د ننګرهار ولایتي اداره وايي، د داعش د تروریستي ډلې دوه مهم پاکستاني غړي نن /یکشنبه/ امنیتي ځواکونو ته تسلیم شول.
د ننګرهار ولایت د مطبوعاتي دفتر په وینا د داعش دا دوه کلیدي غړي د ډیورند د پورې غاړې د اورکزیو ایجنسي اوسېدونکي دي.
ادعا کېږي چې په ننګرهار کې د داعش اکثره مېشت ترهګر د اورکزیو ایجنسي هغه طالبان دي چې پخوا یې د پاکستان له پوځ سره تار درلود او په افغانستان کې یې د طالبانو ملاتړ کاوه.
د ننګرهار د مطبوعاتي دفتر په خبرپاڼه کې ویل شوي چې دا دوه کسه ۴ کاله پخوا له خپل مشر حافظ سعید سره افغانستان ته راغلي او له داعش سره یوځای شوي وو.
تېره میاشت په جوزجان ولایت کې د داعش ۲۵۰ ترهګر د افغانستان حکومت ته تسلیم شول.