تاند، یکشنبه، د دلوې ۶مه: ترانسپورت وزارت وايي، د روزګان د هوايي ډګر کارونه نیمايي بشپړ شوي؛ خو د هوايي ډګر د کنټرول ټاور ودانۍ، د فاضله اوبو او د رمپ جوړولو کارونه یې روان دي.
د یاد وزارت په وینا، د ترینکوټ د هوايي ډګر د کنټرول ټاور ودانۍ، د فاضله اوبو او د رمپ جوړولو په کارونو ۸۴،۰۱۲،۹۳۹.۹۲ افغانۍ لګښت راځي.
د ترینکوټ د هوايي ډګر چارې د افغان رولکس ساختماني شرکت پر مخ بیايي او تراوسه یې ۹۶سلنه کارونه بشپړ کړي دي.
ددې پروژې لګښت د ملکي هوایي چلند ادارې د پرمختیایی بودیجې څخه تمویلېږي او د ۱۲ میاشتو په موده کې به بشپړه شي.
د روزګان هوايي ډګر زیاتې برخې تراوسه پاتې دي؛ خو د ترانسپورت وزارت مسوولین وايي، د دغه هوايي ډګر ټولې اړتیاوې به په راتلونکو څو کلونو کې بشپړې شي او د الوتنو لپاره به برابر شي.
د یادونې ده چې د پلازمېنې کابل په ګډون تراوسه د هېواد یو ولایت هم داسې مجهز هوايي ډګر نه لري، چې له افغانستان تېرېدونکي الوتکې پکې ناستې وکړي او خپلې اړتیاوې پوره کړي.